[Muqdisho]
Maleeshiyo ka tirsan kooxda Al-Shabaab ayaa weli ka dhex dagaalamaya hoteelka Xayaat ee magaalada Muqdisho oo ay ku jiraan muddo ka badan 12 saac oo xiriir ah, waxaana jira khasaare dhimasho iyo dhaawac oo badan.
Al-Shabaab ayaa hotelka, oo ku yaalla agagaarka KM4, waxay weerar ku billowday qaraxyo baabuur ku qaadeen abaare 7-dii habeennimo iyo dhowr daqiiqo, waxaana kadib galay Maleeshiyo ka tirsan kooxdaas.
Waxaa hadda soo baxaya xogta khasaarihii ugu horreeyey, waxaana la xaqiijiyey dhimashada ugu yaraan 15 qof, ayada oo dhaawacana uu intaas aad uga badan yahay.
Dhanka kale kooxda Al-Shabaab ayaa qoraal ay soo saareen ku sheegeen inay hoteelka ku dhex dileen in ka badan 20 qof, balse si madax-banaan looma xaqiijin karo sheegashada kooxdan.
Dadka Hotelka ku dhintay ee aan magacyadooda helnay waxa ka mida:
•Ganacsade Cabdiraxmaan Xassan Iiman,
•Yuusuf Mahad Barrow,
•Ibraahim Raage,
•Cabdihaadi Maxamed Sheekh Aadam,
•Xasan Maxamud Faarax iyo qaar kale.
Dadka ku dhaawcamay waxaa ka mid ah taliyihii Nabadsugidda Gobolka Banaadir Muxiyaddiin Warbac Shadoor oo ka mid ahaa ciidankii u gurmaday hoteelka.
Gudaha hoteelka ayaa waxaa ka socda dagaal u dhaxeeya Ciidanka dowladda iyo Maleeshiyada Al-Shabaab oo aan tiradooda rasmiga ah la aqoon. Maleeshiyadka Al-Shabaab ayaa la sheegay inay saaran yihiin qeybta kore ee hoteelka.
Sidoo kale ciidamo kale oo ka tirsan dowladda oo ku sugan banaanka hotelka ayaa hub culus ku garaacaya hoteelka, ayada oo ay adag tahay in kooxda Al-Shabaab laga saaro.
