Boqortooyada Sacuudiga ayaa kaalin weyn ka qaadaneysa gurmadka abaaraha Soomaaliya, waxa Boqortooyada ku dhawaaqday bixinta kaalmo lacageed oo loogu tala galay in lagu caawiyo dadka Soomaaliyeed ee abaartu saameesay
Xarunta Gargaarka Bani’aadantinimada ee Boqor Salmaan ayaa daah furtay wajigii labaad ee gurmadka degdega , waxaana dowladda Sacuudiga ku dhawaaqday in lacag ku dhow $13 million oo dollar ku garab istaagayso dadka ay saameeyeen abaaraha.
Lacagtan ayeyna sheegtay dowladda Sacuudiga in wax loogu qabanayo dadka Soomaaliyeed ee abaaraha iyo macluusha isugu darsameen, waxaana wajiga koobaad bixin doontaa Sacuudiga 7.18 milyan oo macluusha Soomaaliya wax looga qabanayo.
”Annaga oo ka duulayna awaamiirta Boqortooyada Sacuudi Carabiya ee ah in la garab istaago dadka tabaalaysan ee dalalka walaalaha ah iyo kuwa saaxiibada ah, waxaan daah-furnay wajigii labaad ee gargaarka deg-degga ah si ay uga qayb qaataan daboolidda baahiyaha bini’aadantinimo ee dadka ay saameeyeen abaaraha Soomaaliya” ayaa lagu yiri bayaan kasoo baxay xafiiska Boqor Salmaan.
Boqortooyada Sacuudiga ayaa kamid noqonaya dowladaha Soomaaliya ka taageeraya u gurmashada dadka ay abaaruhu saameeyeen, waxaa sidoo kale jira dowlado iyo hay’addo kala duwan oo iyana Soomaaliya u ballanqaaday dhaqaale wax looga qabto abaaraha.
