[Mogadishu]
waxaa maantay kulan wada jir ah yeelanaya golayaasha baarlamaanka dalka, kaas loogu fariisanaayo aqrinta labaad ee miisaaniyadda dalka taasoo ay soo gudbiyeen golaha wasiirada Soomaaliya, miisaaniyaadaan ayaa ah tii ugu badnayd ee ay soo gudbiyaan golaha wasiirada.
“Berri oo Talaada ah 28 June waxaa jira kulanka Golaha Shacabka Baarlamaanka Jamhuuriyadda Federaalka Soomaaliya. Ajendaha kulanka waa Akhrinta 2aad ee Miisaaniyadda 2022” ayaa lagu yiri qoraal xalay loo kala diray xildhibaanada.
Senatorada Golaha Aqalka Sare ayaa dhankooda loo diray farriin sheegeysa inuu jiro kulankii Wadajirka ahaa ee Labada Aqal ee BFS, inkastoo aqrintii 1-aad ay dood ka keeneen in miisaaniyadda lagu wada aqriyo Villa Hargeysa haddana mar kale ayaa loo yeeray.
Miisaaniyadda sanadkaan 2022 oo ay soo gudbisay Xukuumadda hadda shaqada ka sii tagaysa, ayaa gaareysa $918.7 milyan, taasoo loo gudbiyay Baarlamaanka, si uu u meel-mariyo, halka miisaaniyaddii 2021, ay ahayd, $671 milyan oo doolar.
