[Update]
Gudoomiyaha Maxkamadda Sare JFS, Mudane Baashe Yuusuf Axmed, ayaa maanta booqasho ku tagay Safaaradda Soomaaliya ee Kampala, Uganda oo ay halkaas ku soo dhaweeyeen diblumaasiyiinta ka hawl-gasha xarunta Safaaradda oo uu horkacayo Danjiraha Soomaaliya ee dalka Uganda Amb. Cali Maxamed Maxamuud ( Cali Cagabaruur ).
Guddoomiyaha, ayaa war-bixinno ka dhagaystay Safiirka Soomaaliya ee Uganda Amb. Cali Cagabaruur oo uga xog-waramay sida ay safaaraddu u shaqeyso, howlwadeenada ka howl gala iyo adeegga ay u hayso dadka iyo dalka iyo weli ba guud ahaan xaaladda Jaaliyadda Soomaaliyeed ee ku dhaqan dalka Uganda.
Guddoomiyaha Maxkamadda Sare ee Soomaaliya Mudane Baashe Yuusuf Axmed oo kormeer ku tagay qeybaha kala duwan ee xafiisyada Safaaradda, ayaa diblomaasiyiinta ku boggaadiyey shaqada culus ee ay u hayaan Qaranka iyo guud ahaan shacabka Soomaaliyeed, waxaana uu kula dar-daarmay inay sii laba jibaaraan dedaalka iyo shaqada ay hayaan ba isla-mar-ahaantaana ay muuqaal fiican ka bixiyaan dalkeena Soomaaliya.
Safiirka Soomaaliya u jooga dalka Uganda Amb. Cali Maxamed Maxamuud ( Cali Cagabaruur ) ayaa shaqo muuqata ka qabta safaaradda iyo adeegyada ay u heyso bulshada Soomaaliyeed, waxaana shaqada safiirka si weyn u bogaadiyay masuuliyiinta dowladda iyo jaaliyadda Soomaaliyeed ee Uganda kunool.
