[Mogadishu]
Ra’iisul wasaaraha Soomaaliya Xamse Cabdi Barre ayaa wada wadatashiyadii ugu danbeeyay ee ku aadan magacaabida golaha wasiirada cusub ee Soomaaliya, Kulamadan ayaa waxaa uu la leeyahay qeybaha kala duwan ee bulshada, siyaasiyiinta iyo xildhibaannada Baarlamaanka Soomaaliya.
Warar soo baxaya ayaa sheegaysa in ra’iisul wasaaraha Soomaaliya uu qorsheynayo inuu kordhiyo golaha wasiirada Soomaaliya.
Ilo wareedyo ayaa sheegay in Xamza uu doonayo in wasiirada uu gaarsiiyo illaa 30 xubnood, halka markii hore ay ahaayeen 26 Qorshaha wasiirka koowaad ee xukuumadda cusub ayaa ah inuu soo kordhiyo ugu yaraan illaa 4 wasaaradood oo mid ka mid ah ay tahay wasaaradda deegaanka.
Ra’iisul wasaaraha cusub ayaa la filayaa in maalmaha soo socda uu ku dhawaaqo golihiisa wasiirada, kadibna uu horgeeyo baarlamaanka Soomaaliya, si loo meel-mariyo.
Xukuumadda cusub ayaa waxaa horyaallo shaqooyin adag oo ugu horreyso wax ka qabashada ammaanka iyo xaaladaha abaareed ee haatan ka jira dalka.
Soomaaliya ayaa waxaa ka dhacay isbeddel siyaasadeed, kadib doorashadii 15-kii May oo uu ku soo baxay Xasan Sheekh Maxamuud oo mar labaad loo doortay hoggaanka dalka.
